150系女生穿搭術,嬌小女都變高妹!

864

亞洲女性平均身高一向比歐洲女性為低,但低幾多呢?英國倫敦帝國學院嘅最新研究顯示,拉脫維亞女性平均身高最高,達169.8 cm,香港女仔同佢哋爭大概11 cm,平均身高為159 cm,但已經排第99位。但矮又點喎,健康咪得囉!你啱啊,高矮冇乜所謂,反正各有好處。唔通因為細粒所以永遠都唔洗低頭同人講嘢成個女王咁,我又話你知咩?不過咁,一直都嬌小玲瓏,間中都會想體驗吓做高妹嘅感覺。過咗發育階段,生理上冇得再高,識穿搭其實都幫到唔少。5個150系女生穿搭術,睇吓幫唔幫到你?▼

1. 闊袍大袖,驟眼望落大大舊
可以揀上身闊或者下身闊,千祈唔好成身都蓬蓬鬆鬆,唔係睇落就會成個波咁。
150clothes1

 

2. 橫紋間條,視覺打橫難窈窕
我哋習慣跟線條移動視線,橫紋間條自然會向橫睇,如果你唔想睇上去打橫發展,揀直紋拉長身形比例會好啲。(間條嚟講,幼身直間著上身個視覺效果更佳。)
150clothes3

 

3. 同色衫褲,統一視覺Pure and True
同一個色系,又唔一定要同顏色嘅。最主要係因為唔同顏色會將你嘅身形分成一 Part Part,顏色相差太遠的話,人哋望你自然會分開一 Part Part 咁睇;相反,統一顏色會令你嘅外表更加整齊簡單,可以吸引人哋以「整體」嘅角度望你。
150clothes4

 

4. 短褲短裙,比例拉長變女神
適當地畀你嘅肌膚見光,亦有助拉長視覺上嘅身形比例。150系都可以有長腿,試吓著高腰褲就知!如果唔係咁鍾意露腿,露頸一樣得!夏天熱到出晒汗,有冇諗過剪返個短髮或者紥個高髻,順便露吓頸?
150clothes2

 

5. 瞬間變高,自信高踭有著數
呢個方法最直接,你仲真係高咗添!著唔慣高踭鞋,可以揀厚底鞋或者有內增高墊嘅波鞋,嘩好高啊好高啊:D
150clothes5

 

以上穿搭術只供參考,可以靈活運用嘅。例如你鍾意著橫間,咁咪上身橫間衫,下身短褲囉,一樣拉長到比例㗎,最緊要都係你著得舒服。矮本身唔係一個貶義詞,冇160又如何先?你睇 Miroslava Mikheeva Duma 幾成功?