每個人身邊都總有隻小學雞

338

唔知幾時開始,小學雞唔再只係講開學冇幾耐嗰班小朋友,反而係一班接受過高等教育嘅大人(好多時仲大過你幾個圈添!)你身邊總有一兩位「小學雞」,又或者你就係嗰位小學雞。最鍾意圍威喂,喜怒哀樂寫晒喺塊面,仲非常小氣。呢頭同人嗌交嗌到紅都面晒,下一秒就同人攬頭攬頸 Friend 過打 Band。好鍾意人哋讚,係咁易拍吓手畀幾吓愛的鼓勵,佢就會飛上天唔識落返嚟。如果啲「小學雞」係你朋友都話可以包容吓,間中笑吓佢就算;如果係啲長輩、達官貴人甚至政治領導,你話點搞好?

欺善怕惡
一開始大大聲也文也武,畀啲「地位」高少少嘅人凶一凶就即刻收晒聲,專恰弱勢。
c1

 

狐假虎威
簡單啲嚟講即係鍾意邀功,侍住「後台勁」就亂嚟。有事第一個縮,冇事就會話自己成功爭取乜乜乜。

 

鍾意撩是鬥非
最叻試人底線,但次次都會過晒龍。引起眾怒就搵人幫手,要人幫佢執手尾。
c2

 

死唔認錯
死雞撐飯蓋直到世界盡頭,以為日日講月月講年年講件事就會由錯都變成啱。弔詭嘅係,佢哋真係會因為日日講月月講年年講令愈來愈多人信咗佢嗰套,最後連自己都感覺良好地覺得自己所有嘢都完美。然後?仲邊有然後?

 

易滿足
好似之前咁講,畀人讚吓佢就會好開心。冇好好檢討過究竟真係自己做得好,定只係有某部分人覺得佢做得好。
c3

 

好叻卸膊
「我一早知啦,我唔做之嘛」、「你咁叻,你做囉」等等係佢嘅口頭禪。

 

感情豐富
人嚟嘅,有喜怒哀樂好正常。但情緒泛濫就會好煩囉,尤其係一大班人一齊嗰陣會因為好小事爆喊!爆喊都唔緊要,以為喊,人哋就應該企佢嗰邊呢吓唔好吖嘛!
c4

 

小氣
佢整嬲人就得,人哋同佢玩吓就唔得。少少事都會發好大脾氣,但嬲完人又會驚有其他人嬲佢,所以最後會自己扮冇嘢,當冇事發生。

 

最鍾意圍威喂
認定你係朋友嗰刻佢就會成世都將幫親不幫理,第一時間企你嗰邊。朋友嘅朋友係朋友;朋友嘅敵人係敵人;敵人嘅朋友係敵人;敵人嘅敵人就係朋友,非常分明。
c5

 

輸打贏要
公就我贏,字就你輸!龍門任佢搬,但你唔准話佢錯,一話佢錯佢就嬲豬㗎喇!

 

以上都只係小學雞部分性格,但你應該都感覺得到小學雞到底有幾好乞人憎。咁點解你會肯同佢繼續做朋友呢?因為人以群分,物以類聚吖嘛,你可能都有唔少小學雞特質,咪相處得嚟囉。夾得到,你笑吓我,我串吓你,無傷大雅嘅。但萬一你接受唔到,唔該你出聲,唔該你表達出嚟。唔該你令佢知道有啲嘢要改變,大家先可以「和平理性非暴力」繼續喺同一個地方生活。

 

順帶一提,記得9月4日出嚟投票。
順帶二提,我已經忍咗手冇貼其他相,班小學雞自己對號入座係你哋自己嘅事。