老媽子10大口頭禪

438

世界上有個物種叫「老媽子」。識嘅嘢可能冇你咁多,但頭家佢打理得頭頭是道,裡裡外外都洋溢住一片和諧。佢哋外型唔同,樣貌唔同,性格亦唔見得一樣,但口頭禪竟然有9成似!唔信?以下10句老媽子口頭禪,你屋企嗰位有冇講過?

 

1. 攞遮未呀?
魔咒嚟㗎!老媽子差唔多日日都提你帶遮,你聽佢講,真係帶把遮出去嗰日通常都唔會落雨;你諗住信自己,特登唔帶遮咩?嗰日分分鐘又頭濕到落腳趾。
mama1

 

2. 凍㗎(商場凍啊/返風啊/落完雨會凍啊),帶件衫呀!
俗語有云:「有一種凍,叫阿媽覺得你凍。」一年四季都袋定件外套就實冇死。
mama2

 

3. 幾點呀,仲唔瞓(仲瞓)?
一定係問你幾點先,但唔會Expect你答佢。簡單啲嚟講,呢個本身唔係一個問題,係一個警告。
mama3

 

4. 返唔返嚟食飯?
呢到要代各位老媽子話一話大家,喂食唔食飯好閒㗎咋!你唔食咪早啲話佢知囉,又或者你同佢講聲:「預我唔食,我食再話你知啦。」咁人哋唔洗煮N咁多樣餸,最後都要放晒入雪櫃吖嘛!啲魚要新鮮食㗎衰女(仔)!
mama4

 

5. 有冇XX印花?
換啲煲煲罉罉行李篋床單枕袋佢哋最叻,但有時其實係想幫你換公仔磁石鎖匙扣囉。
mama5

 

6. 屋企成千尺地方呀?
通常喺你唔執房/買咗好多嘢返屋企嗰陣就會聽到。
mama6

 

7. 做其他嘢有而家咁好心機就好喇。
做緊學生嗰陣可能會聽得多啲。而家大咗,聽到呢番說話嘅當下,你應該係好專注咁Plan緊旅行行程,或者好興奮咁話緊畀佢知你又成功買到平機票。
mama7

 

8. 幫我睇吓吖!
電費單/水費單/銀行信/電腦/電話等,總之佢有一隻字唔明,都會叫你幫佢睇吓。
mama8

 

9. 我點知啫!
老媽子唔知係大晒㗎!佢唔知,所以啲單全部要你睇;佢唔知,所以可以一個唔該清晒你啲珍藏;佢唔知,所以可以無畏無懼地做錯事。你唔可以怪佢,因為佢真係唔知⋯⋯
mama9

 

10. 第時做人阿媽你就知!
每當你有埋怨,而老媽子唔知可以點回應,心底裡又覺得極度委屈之際,佢就會緩緩吐出呢一句。媽,但你啱啱先講完:「我點知啫!」咋喎。
mama10