誠實?我哋對自己最唔誠實。

259

「口裡說不,身體卻很誠實。」連身體都識對自己誠實,你仲呃自己所有嘢都好美好,醜唔醜?我哋成日話講一套做一套嘅人好乞人憎。咪玩啦,最口是心非嗰個會唔會係你啊?誠實?我哋對自己最唔誠實。

明明唔開心,又要話自己冇嘢。
苦瓜乾咁嘅口面,基本上一睇就知你有嘢,都要話冇事。個心好想有人同你傾偈,幫你分擔,到真係有人睇得出主動問候你,你又要驚麻煩人(喂人哋覺得煩會開口同你講囉!)Ok 可能你覺得冇人幫到你所以想自己嚟,唔緊要,但點解唔可以承認自己唔開心,需要時間調整?只係不斷同自己講「我冇嘢我冇嘢我冇嘢」就唔會唔開心?
honest1

明明冇感覺,又要逼自己熱衷。
其實你個心同你個腦裝唔到咁多人,裝唔到咁多事,係冇問題㗎。點解一定要跟風?舉個好簡單嘅例子,你對奧運冇感覺,對邊個國家嘅選手拎金牌冇興趣,冇所謂㗎,唔使逼自己日日 share post 話邊個邊個攞就實至名歸,懶係要參與吓討論咁,no one cares! 係咪連呢啲都要秉承住「執輸行頭慘過敗家」?
honest2

明明好開心,又要扮唔在乎。
啲乜乜愛情導師可能會教你,開心都唔好表現出嚟,免得人哋覺得你易氹,就唔會 100% 投入段感情。一係就會有人話,職場上喜怒形於色會好蝕底。吓?可以令到身邊嘅人開心,係極大嘅優點嚟,你畀對方見到你因為佢而開心,佢會更加想同你建立關係添啦吓嘛?
honest3

 

明明唔忿氣,又笑晒話好好好。
應開心嗰陣又唔表現出嚟,唔忿氣嗰陣又要笑到烚熟狗頭咁嘅樣,我哋真係好奇怪。據理力爭有冇聽過?如果你有理有據,點解一定要接受人哋嗰套,而唔係大力推廣自己嗰套,睇吓有冇人志同道合可以壯大道氣?
honest4

 

明明覺得自己冇錯,又乜錯都攬晒上身。
知唔知認錯嘅意義係咩?係你做錯咗影響到人,所以認錯,希望得到人哋嘅諒解,等你可以放下愧疚,有一個額外機會做返好。但如果你本身冇錯,咁認咩錯?咁做唔單止剝奪咗本身做錯嗰個人認錯嘅權利,搞到人哋冇得進步;你仲會將你嘅「啱」定咗做「錯」嘅標準,以後就是非不分,何必呢?
honest5

 

明明搞唔掂,又話自己搞得掂。
搞唔掂,搵人幫,係簡單到喊嘅生存法則。偏偏我哋鍾意呃自己,同自己講「我一個人都搞得掂!」結果愈搞愈衰,之後可能係用到幾倍嘅力都係搞唔掂。將心比己,人哋搞唔掂可以搵你幫,你搞唔掂點解唔可以接受人哋同你一齊搞掂佢?
honest6

 

明明好嬲,又要扮大方當冇咗件事。
件事一日未解決,佢一日都喺度,係你個結嚟。有不滿要話畀對方知,唔係你積埋積埋,到有一日爆晒出嚟就好大件事。你話發脾氣解決唔到問題,但發脾氣只係嬲嘅其中一種表達方式,如果你可以用其他方法抒發到呢種嬲,唔使扮大方就冇問題。
honest7

 

明明想話事,又要_住咁做奴隸。
呢個你知我知天知地知啦,小編唔否認有人真係覺得冇得作主都唔緊要,但前題係你打從心底係咁諗,而唔係侷住要咁諗。醒吓啦,唔好再呃自己你乜都唔做,個社會就會變好,冇咁著數㗎。
honest8

 

做咩啫而家?唔開心唔得㗎?大方就有人當你聖人呀?你普通人嚟㗎咋,有情緒好・正・常囉。你冇咁叻可以諗埋人哋嗰份,顧掂自己先好唔好?王菲同夕爺都有教啦:「自己都不愛,怎麼相愛?」都唔淨止愛情,你唔對自己誠實,點用最真一面面對家人、朋友甚至個社會?