香港人10大口頭禪

2801

除咗「點解嘅?」同「齋㗎(真係㗎)?」之外,香港人仲有好多口頭禪,呢啲字句多多少少反映緊我哋嘅生活文化。筆者個人嚟講好鍾意留意唔同人嘅口頭禪,除咗因為用廣東話講出嚟別有一番風味之外,了解吓點解某啲人會用某幾句都好有趣。冇錯,事出必有因,了解說話同行動嘅背後原因好重要。(順帶一提,9月4日投票日,記得都要了解完啲候選人參選嘅原因,先好投下你重要嘅一票。)

 

1. 唔係掛
香港人對人對事都冇信心,所以其實一直都會提自己唔好有期望,咁就唔會失望。但留意返,件事唔變好,唔代表佢會Keep住係咁,可以變衰㗎!但我哋好多時都冇諗到呢一步,到真係見到個情況愈變愈壞,又會唔想相信件事會發生到一個不可收拾嘅地方,於是就會矛盾地講出一句「唔係掛?!」
catchphase15

 

2. 你肯定?
正如頭先所講,對人對事都冇乜信心嘅我哋,最信嘅可能係自己睇到同聽到嗰套。當對方講/做咗啲同自己嗰套有出入嘅嘢,我哋就會質疑:「你肯定?」(質疑唔係壞事,真理愈辯愈明吖嘛!)

 

3. 所以?
香港地太多會講廢話嘅人(包括筆者lol),永遠都只係會帶你遊花園,從來唔識答人問題,所以大家只可以喺佢哋狗噏完一大輪之後,追問一句「所以?」,希望可以拎返個重點。
catchphase10

 

4. 唔知啊/唔知喎/點知啫
唔想用腦嗰陣就會講呢句,用詞會隨情緒而改變,講到「點知啫?」通常已經惱羞成怒。

 

5. 是但啦/冇所謂
都係唔想用腦就會講,不過呢,如果佢真係冇所謂所以話「冇所謂」,其實冇所謂嘅。
catchphase11

 

6. 你鍾意啦
想唔用腦又唔想畀人話,一轉身射個3分波講句「你鍾意啦!」就可以完美地卸個責任畀其他人。

 

7. 好似係
驚錯驚瘀驚冇面,最驚對方質疑自己,驚自己唔夠料咁樣樣。帶定頭盔咁講,就可以本人意見不代表本人立場咁發表意見啦。
catchphase13

 

8 冇呀⋯⋯
都係戴頭盔嘅方法之一,一定係用喺緊要事嘅開頭。「冇呀⋯⋯想問你聽日得唔得閒咋嘛」、「冇呀⋯⋯近排手頭緊」、「冇呀⋯⋯想問你嚟緊投邊個囉」冇咩啫冇?擺明就係有啦!

 

9. I mean⋯⋯/我意思係⋯⋯
香港係國際大都會,華洋雜處吖嘛,間中講嘢有英文有幾出奇啫,你知兩者用法一樣咪得囉。一般會用喺知道自己講錯嘢,要幫自己兜返嘅時候。
catchphase14

 

10. X/ XX/ XXXX/ XXXXX
用於加強語氣。