8條你一定藐過嘅校規

471

又就嚟9月,又就快開學喇!(話時話而家啲學生又要補課又要返興趣班又盛,係咪冇暑假放?)數數手指,離開中學校園都有好幾個年頭,但啲回憶依然非常深刻,尤其係老師花名、學校秘聞同埋同學仔之間嘅無聊事。平時返工返到虛脫,得閒約朋友食飯拎呢啲話題出嚟笑吓回味吓其實都幾開心,今期不如講吓校規?所謂各處鄉村各處例,唔同學校有唔同校規,但一講起,你又會覺得大同小異▼

1. 唔准著住校服喺街邊食嘢
肚餓都唔畀?唔畀!著住校服就唔畀,就算行出咗校門,你著住校服就代表緊學校⋯⋯(下刪10分鐘訓話)
school1

 

2. 唔准著住校服喺校外籃球場打波
原因同上,最好你一放學就即係出現喺屋企,唔畀喺街外「流連」

3. 頭髮前陰唔准過眼眉
女同學可以用髮夾夾起(但其實學生們都係係咁易夾住執頭髮,點會真係夾起lol);男同學呢,通常會有個訓導主任會話親手幫你剪囉。
school4

 

4. 長頭髮一定要鬢辮
可以話係名校身份象徵,個個年輕版汪阿姐咁嘅純樸樣,好 Pure。
rule15

 

5. 耳珠上最多只可以有一對透明耳針
唔准釘咁多耳窿!仲會釘耳骨添?冇呀,唔畀呀,只可以耳珠有耳窿,但返學唔畀帶耳環,帶耳針啦!要透明,唔畀有任何顏色,全透明呀!(謎之聲:粗針好定幼針好?梗係粗針啦,粗幼針耳環都帶到嘛。)
school6

 

6. 唔准放書喺櫃檯過夜
有Locker畀你放點解唔放呀?係咪要畀人偷書先安樂呀?唔畀放書喺櫃檯過夜,我哋會叫工友見一本收一本!
school7

 

7. 冬天一定要著校褸
阿Sir,件校褸又重又唔暖㗎喎⋯⋯唔理啦,要著!早會全世界都要著校褸,唔著都要帶住。(除咗影班相同早會時間,你有冇著過件大地牌校褸?)
school3

 

8. 食飯時間以外,唔准喺課室食嘢
小息要食餅乾食麵包就行6層樓梯落 Canteen 食,之後行返6層樓梯返課室上堂,等到 Lunch Time 就可以喺課室食餅乾食麵包嘞。
school8

 

順帶一提,以前覺得校規唔合理,你都會暗地裡反抗。而家呢?