【見工奇聞‬】上次見工個老細戴黑超in人

469

雖然最近筆者失業嘢做,但係都冇強求自己一定要工接工,完全唔俾空間同時間自己諗清楚究竟想做啲乜嘢、想生活點樣過。都有名你叫啦,小廢青年,當然行事作風都要盡顯廢青本色。抖咗一排之後,就開始send求職信,漁人撒網並唔係筆者求職嘅方法,真係好有興趣嘅公司先會send,廢事浪費大家時間。

見咗幾份工,見唔少有趣嘅事想分享下。

第一件趣事,就係面試者臨時cancel個Interview,原因係「乜我約咗你今日咩?」,即使出咗門口,都要返番屋企。

第二件趣事係面試者遲到,坐咗喺會議室等咗成粒鐘都未見人影,佢地係呢個心態:「你宜家嚟求我俾份工你啊,等下好基本啦。」

第三件趣事,就係見完第一次Interview之後,對方隨即約Second in,要求下次見面要有Proposal,好難唔令人好陰謀論咁諗:「如果你唔請我,我咪免費幫你度橋?」大家醒水諗清楚啦,有啲公司已經出晒名偷用求職者橋,但最後唔請。其實見工嘅人一早準備好晒Portfolio俾間公司參考,點解係都要要求人哋專程為你公司度晒橋、畫好晒Design先?唔係唔得,但請你俾錢。

第四件趣事係第一次去面試已經要求簽Agreement,內容大概係間公司嘅員工唔可以盜用公司資源,個情況就好似前排選委會要求參選人簽確認書,如果唔簽你係咪DQ我先?但問題係你都未請我,約都未簽,我都未係你公司員工。

最後第五件趣事,就係有次個面試者戴住黑超嚟interview,確實令筆者感到非常新鮮。

唉呀,祝各位廢青好運啦!