今次真係柒過關家姐,做人轉數快真係好緊要

637

上次嗰篇《砌完啲高達送俾人?我砌完你都唔會送俾人啦!》先講完,做人轉數快真係好緊要,好可惜今次就到小廢青年柒出國際。

件事係咁嘅,上星期小廢青年同男朋友去咗旺角一間盲人按摩店,上到去Reception個姐姐就話:「男仔就安排男按摩師,女仔就安排女按摩師啦好冇?」我哋話ok之後就入房換衫,間房有2張床,中間有個拉簾,我哋分別換好衫就坐喺張床上面等按摩師嚟,我就掛住低頭禁手機,冇幾耐有個按摩師拉開個簾入到嚟打咗聲招呼,我聽到一把陰沈嘅聲,就以為係男按摩師,就即刻好慌張咁話:「個男仔喺隔離喎!」個按摩師問:「下?我係女架喎!」他媽的,我心諗我已經柒左,個女按摩師仲要問:「你以為我係男人啊?」好彩佢都係笑住問,你知啦,我一陣就將全身交托佢,好驚架嘛!但嗰刻實在事出突然,小廢青年轉數唔切,答咗句:「哦……我以為隔離個男仔冇按摩師咋嘛。」頂,我知道我已經柒咗啦。

事後我同男朋友講返,佢話佢聽到我哋講乜,都覺得我答得奇奇怪怪架啦,佢話佢心諗:「你講緊乜,咁樣兜都得?」唉!