唔鍾意去旅行嘅7個原因

1684

俗語有云:高溫燒滾了我一切!
出面熱到個人就快溶,火氣大,脾氣仲大,樣樣嘢都好似唔合心意咁!點樣可以減壓?個個都答去旅行。去旅行?聽到就嬲!最憎去旅行!

1. 世界太大,要去太多地方
淨係最熱門嘅台灣,都有台北、高雄、台中、宜蘭、台東、台南、綠島、蘭嶼⋯⋯幾時先去得晒啊?旅行會上癮㗎嘛!唔通個個地方都到一到打個卡就當去咗啊?
notravel1

 

2. 唔想突破
喺香港日日返工、放工、食、瞓、做,慣晒㗎啦,你叫我跳出Comfort Zone?話跳就跳呀?邊有力跳呀?
notravel2

 

3. 唔想因為要返屋企而失落
離開是為了回來,去旅行再開心都要返嚟接受現實。飛機降落到停機坪嗰吓,個心會無端端實一實。好憎!
notravel3

 

4. 唔想面對自己
唔少個人背包客都會話,去旅行係個面對自己嘅好方法。去旅行冇人煩你,又冇人畀你煩,自自然然會自己同自己講嘢,你冇藉口忽略內心深處嘅渴求。但自己知自己事,面對自己即係要有咁深挖咁深,所有情緒同陰暗面都會赤裸裸咁搬晒出嚟,你估個個頂得順呀?
notravel4

 

5. 唔想同人講 Bye Bye
去旅行可以識到好多唔同嘅人,聽到好多有趣嘅故事,但愈投入就愈唔捨得。同新朋友傾偈食飯,你覺得大家好似識咗好耐咁,但幾日後大家就會各散東西,講完 Bye Bye 可能以後都唔會再見。
notravel5

 

6. 身體會攰,個心仲攰
一旦愛上去旅行嘅感覺,就好難返轉頭。以後無時無刻都會想出走,但經濟能力有限,你都係要日日做到隻狗咁賺返啲旅費,好攰!去完旅行返嚟,你唔會想返工;但唔返工,你又未必去到旅行,每日遊走喺呢啲深層次矛盾,個心都好攰呀!
notravel6

 

7. 唔想呃自己
其實你好鍾意好鍾意好鍾意去旅行,但因為而家呢刻你去唔到,咪唯有呃自己,話唔鍾意去囉。我哋香港人最叻就係自己呃自己㗎啦;)
notravel7

 

鳴呀好想去旅行散心呀!痴線,而家香港都唔知幾好呀,空氣又清新,政府又勤政愛民,梗係留港消費啦!最憎去旅行呀我話你知!