首先你要靚仔!吓⋯⋯邊個話?

674

每次有女仔講起男仔點點點好吸引,就會有班人衝出嚟話:「首先⋯⋯你要靚仔!靚仔做乜都得嘅,靚仔放個屁都香啲,靚仔就算一腳踏兩船都情有可原吖嘛,膚淺!」即係咁,絕對唔否認靚嘅外表會為一個人加分,但係咪真係首先要靚仔先?咁梗係唔係啦,以下10位代表,唔係大眾一見到就會驚嘆好靚仔嗰班,甚至會有人話佢哋醜樣,但女仔見到嗰陣都係會心心眼。第一眼唔靚仔,但愈睇愈吸引,愈睇愈想睇,網路上叫呢啲人做「醜帥」。即係佢醜,但都好帥,係咪好矛盾?係㗎,人生不嬲都係咁矛盾㗎啦!

韓國代表:
蘇志燮
sojisub1
堪稱第一代韓國「醜帥」,雖然冇好突出嘅五官,但Fit到喊嘅身材同氣質已經夠影迷瘋狂。

 

金宇彬
kimwoobin
第一眼望埋去,硬係覺得金宇彬五官唔和諧,但睇耐啲就會被佢吸引住。演技備受推崇,忠又得奸又得。

 

柳俊烈
Ryujunyeol
憑《請回答 1988》正煥一角彈起嘅柳俊烈算係新一代韓國「醜帥」代表,眼細唇厚明明就唔係大眾杯茶,但劇入面情深又傲嬌嘅佢,分分鐘比同劇一眾靚仔演員更得人心。

 

徐仁國
seoinguk
唱歌同演戲都大受好評,但其實好多人話第一次睇《請回答 1997》見到徐仁國都不忍直視。

 

李光洙
Leekwangsoo
同韓國美男級演員宋仲基仲有趙寅成好好朋友,所以成日畀人寸佢拉低咗大家嘅靚仔指數。賣唔到樣,但賣搞笑、賣落力同賣暖男性格嘅亞洲王子李光洙究竟有幾受歡迎,唔使小編講你都感受到啦吓嘛?

 

雖然「醜帥」係韓國帶起,但唔代表得韓國有!

 

台灣代表:
吳建豪
vannesswu
當年嗰把負離子長直髮,仲有主題曲最後嗰句「你會看見幸福der~所在姨夜以也咦嗌」係佢嘅標誌,F4嗰個美作喎,邊個唔識?

 

周杰倫
jaychou
姐卵初出道嗰陣鄉土味比較重,明顯唔係偶像派,於是大家好自然Focus喺佢嘅才華,結果一欣賞就欣賞咗十幾年。到今時今日佢做咗人老公同爸爸,大家依然會好期待佢嘅作品。

 

英國代表:
Benedict Cumberbatch
benedict
唔靚仔,一樣可以成為英國嘅男神代表!曾經贏咗碧咸榮登最性感男士,你唔明?睇過佢啲戲,你就會明!入門級可睇佢嘅代表作《Sherlock》,淨係聽聲都暈啊!

 

美國代表:
Steve Buscemi
steve
成日都會喺啲惡搞meme到見到Steve Buscemi,演技同講嘢嘅腔調都有魔力,多數都係做配角嘅佢,有時比主角仲搶鏡。

 

香港代表:
張敬軒
hins
軒仔出道嗰刻大家都知佢唔係賣樣,有時仲畀人話佢似馬騮(佢自己都話過自己係泰籍印度敬囂王),但大家依然好鍾意佢。除咗因為佢好有音樂才華之外,敢言都係佢一大賣點。(題外話:幾時開始肯表達自己睇法就會受追捧?)

 

同場加映:
梁天琦
leung
識講點會係講佢個樣?唔算靚仔,咁點解會有咁多人欣賞佢你知唔知?一年前佢仲係普通學生,但今日已經係為人熟悉嘅政治人物,哥哥姐姐弟弟妹妹都開始想了解佢口中講緊嗰套,點解?香港人你仲未知點解咩?

 

相由心生係真㗎,當你有自信、有才華,個樣就會慢慢變得愈嚟愈好睇(如果你仲覺得樣係最重要的話)。所以,男士們,唔靚仔真係唔緊要!唔好掛「首先你要靚仔」喺嘴邊畀藉口自己,畀心機發掘自己嘅魅力,總會有人為你神魂顛倒。明天會更好吖嘛,你話係咪呀哈姆太郎?

Gif來源:互聯網, YouTube